Nyt on alkanu vanhale ulko-ovele lähtölaskenta.Onhan se kyllä palvellu meitä hyvin monia vuosia. Kläpit ovat räivihneet sitä ja pamhauttahneet voimala kiini. Ongelmia on alkanu olla oven kiini laitossa. Vaikka kuinka yrittää niin ei onnistu. Aika vethoinenki se alkaa jo olehman, sukat vain pyörivä jalassa ko seisoo etheisessä. Tänhän käythin Lakkapäältä esitheitä hakemassa, mutta muualtaki kyselhän hintoja. Ja huomena tullee Lämpäluksilta ikkunoitten esittelijä ja heilähän on myös ovia. On ainaski mistä valita.
On ollu sitten mietintämyssy päässä ja olema päätyhneet ovhen, mikä on samanlainen ko kuvssa alhaala oleva keskimmäinen ovimalli
LämpöLuksin oven etuja
mutta eiköhän muilaki ole jonkinlaisia etuja.
Mietintämyssy on ussein käytössä. Ko joltaki kyssyy asiaa, niin vastaus on, oota mie mietin jonkin aikaa. Aikoihnan ehotima, että me tehemä jonkinlaisen myssyn, missä olisi jos jonkinmoisia ulokheita ja härveleitä. Antaisima sen sitten sille joka tarvittee sitä. Kaverila oli monenlaisen myssyn kuvia, mutta ne ovat kuulema kaohneet kaikki. Sano, että hän on vishin laittanu ne roskhin.
Muutama päivä sitten tuli taas puhetta mietintämyssystä ja kaveri sano että hän oli ettiny uuet kuvat:
No näissä on ainaski vaikka minkälaista härveliä, joten ei ko tekehmän. Met annama sitte sen kaveriporukassa sille joka tarvittee sitä.
Meilä on vielä jonki verran lunta pihala. Se ei vähene nopeasti ko on ollu yöpakkasia. Ei ole tehty vielä mithän ulkohommia, mutta suunniteltu on sitäki enemmän. Ja eikös se ole jo puoliksi tehty. Ehkä pääshän haravointi homhin loppu kuusta. Joitaki muuttolintujaki on jo ilmaantunu. Kevät tullee tänneki.
Tervetuloa uuet plokin lukijat.
Kommentit ilahuttavat, kiitos.